Dakshina Kalika Stotram ದಕ್ಷಿಣ ಕಾಲಿಕಾ ಸ್ತೋತ್ರಂ

                ಅಥ ಶ್ರೀ ದಕ್ಷಿಣ ಕಾಲಿಕಾ ಸ್ತೋತ್ರಂ 

ಶ್ರೀ ಗುರುಭ್ಯೋ ನಮಃ ಹರಿ: ಓಂ 
ಓಂ ಕೃಶೋದರಿ ಮಹಾಚಂಡಿ ಮುಕ್ತಕೇಶಿ ಬಲಿಪ್ರಿಯೇ .
ಕುಲಾಚಾರಪ್ರಸನ್ನಾಸ್ಯೇ ನಮಸ್ತೇ ಶಂಕರಪ್ರಿಯೇ .. ೧..

ಘೋರದಂಷ್ಟ್ರೇ ಕೋಟರಾಕ್ಷಿ ಗೀತಿಶಬ್ದ-ಪ್ರಸಾಧಿನಿ .
ಘೋರಘೋರಾರವಾಸ್ಫಾಲೇ ನಮಸ್ತೇ ಚಿತ್ತವಾಸಿನಿ .. ೨.. 

ಬಂಧೂಕಪುಷ್ಪ-ಸಂಕಾಶೇ ತ್ರಿಪುರೇ ಭಯನಾಶಿನಿ  .
ಭಾಗ್ಯೋದಯ-ಸಮುತ್ಪನ್ನೇ ನಮಸ್ತೇ ವರವರ್ಣಿನಿ .. ೩..

ಜಯ ದೇವಿ ಜಗದ್ಧಾತ್ರಿ ತ್ರಿಪುರಾದ್ಯೇ ತ್ರಿದೇವತೇ . 
ಭಕ್ತೇಭ್ಯೋ ವರದೇ ದೇವಿ ಮಹಿಷಘ್ನಿ ನಮೋಽಸ್ತುತೇ .. ೪..

ಘೋರವಿಘ್ನ-ವಿನಾಶಾಯ ಕುಲಾಚಾರ-
ಸಮೃದ್ಧಯೇ .ನಮಾಮಿ ವರದೇ ದೇವಿ ಮುಂಡಮಾಲಾ-ವಿಭೂಷಣೇ .. ೫..

ರಕ್ತಧಾರಾ-ಸಮಾಕೀರ್ಣೇ ಕಲಕಾಂಚೀ-ವಿಭೂಷಿತೇ . 
ಸರ್ವವಿಘ್ನಹರೇ ಕಾಲಿ ನಮಸ್ತೇ ಭೈರವಪ್ರಿಯೇ .. ೬..

ನಮಸ್ತೇ ದಕ್ಷಿಣಾಮೂರ್ತ್ತೇ ಕಾಲಿ ತ್ರಿಪುರಭೈರವಿ .
ಭಿನ್ನಾಂಜನ-ಚಯಪ್ರಖ್ಯೇ ಪ್ರವೀಣ-ಶವಸಂಸ್ಥಿತೇ .. ೭..

ಗಲಚ್ಛೋಣಿತ-ಧಾರಾಭಿಃ ಸ್ಮೇರಾನನ-ಸರೋರುಹೇ .
ಪೀನೋನ್ನತ-ಕುಚದ್ಬಂದ್ವೇ ನಮಸ್ತೇ ಘೋರದಕ್ಷಿಣೇ .. ೮..

ಆರಕ್ತಮುಖಶಾಂತಾಭಿರ್ನೇತ್ರಾಲಿಭಿರ್ವಿರಾಜಿತೇ .
ಶವದ್ವಯ-ಕೃತೋತ್ತಂಸೇ ನಮಸ್ತೇ ಮದವಿಹ್ವಲೇ .. ೯..

ಪಂಚಾಶನ್ಮುಂಡ-ಘಟಿತಮಾಲಾ-ಲೋಹಿತಲೋಹಿತೇ .
ನಾನಾಮಣಿ-ವಿಶೋಭಾಢ್ಯೇ ನಮಸ್ತೇ ಬ್ರಹ್ಮಸೇವಿತೇ .. ೧೦..

ಶವಾಸ್ಥಿ-ಕೃತಕೇಯೂರೇ ಶಂಖ-ಕಂಕಣ-ಮಂಡಿತೇ .
ಶವವಕ್ಷಃಸಮಾರೂಢೇ ನಮಸ್ತೇ ವಿಷ್ಣುಪೂಜಿತೇ .. ೧೧..

ಶವಮಾಂಸಕೃತಗ್ರಾಸೇ ಸಾಟ್ಟಹಾಸೇ ಮುಹುರ್ಮುಹುಃ .ಮುಖಶೀಘ್ರ ಸ್ಮಿತಾಮೋದೇ ನಮಸ್ತೇ ಶಿವವಂದಿತೇ .. ೧೨..

ಖಡ್ಗಮುಂಡಧರೇ ವಾಮೇ ಸವ್ಯೇಽಭಯವರಪ್ರದೇ . 
ದಂತುರೇ ಚ ಮಹಾರೌದ್ರೇ ನಮಸ್ತೇ ಚಂಡನಾಯಿಕೇ .. ೧೩..

ತ್ವಂ ಗತಿಃ ಪರಮಾ ದೇವಿ ತ್ವಂ ಮಾತಾ ಪರಮೇಶ್ವರಿ .
ತ್ರಾಹಿ ಮಾಂ ಕರುಣಾಸಾರ್ದ್ರೇ ನಮಸ್ತೇ ಚಂಡನಾಯಿಕೇ .. ೧೪..

ನಮಸ್ತೇ ಕಾಲಿಕೇ ದೇವಿ ನಮಸ್ತೇ ಭಕ್ತವತ್ಸಲೇ .
ಮೂರ್ಖತಾಂ ಹರ ಮೇ ದೇವಿ ಪ್ರತಿಭಾ-ಜಯದಾಯಿನಿ .. ೧೫..

ಗದ್ಯಪದ್ಯಮಯೀಂ ವಾಣೀಂ ತರ್ಕ-ವ್ಯಾಕರಣಾದಿಕಂ .
ಅನಧೀತಾಗತಾಂ ವಿದ್ಯಾಂ ದೇಹಿ ದಕ್ಷಿಣಕಾಲಿಕೇ .. ೧೬..

ಜಯಂ ದೇಹಿ ಸಭಾಮಧ್ಯೇ ಧನಂ ದೇಹಿ ಧನಾಗಮೇ .
ದೇಹಿ ಮೇ ಚಿರಜೀವಿತ್ವಂ ಕಾಲಿಕೇ ರಕ್ಷ ದಕ್ಷಿಣೇ .. ೧೭..

ರಾಜ್ಯಂ ದೇಹಿ ಯಶೋ ದೇಹಿ ಪುತ್ರಾನ್ ದಾರಾನ್ ಧನಂ ತಥಾ . ದೇಹಾಂತೇ ದೇಹಿ ಮೇ ಮುಕ್ತಿಂ ಜಗನ್ಮಾತಃ ಪ್ರಸೀದ ಮೇ .. ೧೮..

ಓಂ ಮಂಗಲಾ ಭೈರವೀ ದುರ್ಗಾ ಕಾಲಿಕಾ ತ್ರಿದಶೇಶ್ವರೀ .ಉಮಾ ಹೈಮವತೀ ಕನ್ಯಾ ಕಲ್ಯಾಣೀ ಭೈರವೇಶ್ವರೀ .. ೧೯..

ಕಾಲೀ ಬ್ರಾಹ್ಮೀ ಚ ಮಾಹೇಶೀ ಕೌಮಾರೀ ವೈಷ್ಣವೀ ತಥಾ .ವಾರಾಹೀ ವಾಸವೀ ಚಂಡೀ ತ್ವಾಂ ಜಗುರ್ಮುನಯಃ ಸದಾ .. ೨೦..

ಉಗ್ರತಾರೇತಿ ತಾರೇತಿ ಶಿವೇತ್ಯೇಕಜಟೇತಿ ಚ .
ಲೋಕೋತ್ತರೇತಿ ಕಾಲೀತಿ ಗೀಯಸೇ ಕೃತಿಭಿಃ ಸದಾ .. ೨೧..

ಯಥಾ ಕಾಲೀ ತಥಾ ತಾರಾ ತಥಾ ಛಿನ್ನಾ ಚ ಕುಲ್ಲುಕಾ .
ಏಕಮೂರ್ತ್ತಿಶ್ಚತುರ್ಭೇದಾ ದೇವಿ ತ್ವಂ ಕಾಲಿಕಾ ಪುರಾ .. ೨೨..

ಏಕದ್ವಿ-ತ್ರಿವಿಧಾ ದೇವೀ ಕೋಟಿಧಾನಂತರೂಪಿಣೀ .
ಅಂಗಾಂಗಿಕೈರ್ನಾಮಭೇದೈಃ ಕಾಲಿಕೇತಿ ಪ್ರಗೀಯತೇ .. ೨೩..

ಶಂಭುಃ ಪಂಚಮುಖೇನೈವ ಗುಣಾನ್ ವಕ್ತುಂ ನ ತೇ ಕ್ಷಮಃ . ಚಾಪಲ್ಯೈರ್ಯತ್ಕೃತಂ ಸ್ತೋತ್ರಂ ಕ್ಷಮಸ್ವ ವರದಾ ಭವ .. ೨೪..

ಪ್ರಾಣಾನ್ ರಕ್ಷ ಯಶೋ ರಕ್ಷ ಪುತ್ರಾನ್ ದಾರಾನ್ ಧನಂ ತಥಾ . ಸರ್ವಕಾಲೇ ಸರ್ವದೇಶೇ ಪಾಹಿ ದಕ್ಷಿಣಕಾಲಿಕೇ .. ೨೫..

ಯಃ ಸಂಪೂಜ್ಯ ಪಠೇತ್ ಸ್ತೋತ್ರಂ ದಿವಾ ವಾ ರಾತ್ರಿಸಂಧ್ಯಯೋಃ .ಧನಂ ಧಾನ್ಯಂ ತಥಾ ಪುತ್ರಂ ಲಭತೇ ನಾತ್ರ ಸಂಶಯಃ .. ೨೬..

ಇತಿ ಶ್ರೀ ದಕ್ಷಿಣಕಾಲಿಕಾಸ್ತೋತ್ರಂ ಸಂಪೂರ್ಣಂ .

ಶ್ರೀ ಕೃಷ್ಣಾರ್ಪಣಮಸ್ತು