ಶ್ರೀರಾಮಲಕ್ಷ್ಮಣಸ್ತೋತ್ರಮ್
ಶ್ರೀ ಗುರುಭ್ಯೋ ನಮಃ. ಹರಿಃ ಓಂ
ಕಮಲಲೋಚನೌ ಕಾಂಚನಾಮ್ಬರೌ ಕವಚಭೂಷಣೌ ಕಾರ್ಮುಕಾನ್ವಿತೌ । ಕಲುಷಸಂಹರೌ ಕಾಮಿತಪ್ರದೌ ರಹಸಿ ನೌಮಿ ತೌ ರಾಮಲಕ್ಷ್ಮಣೌ ॥ 1॥
ಮಕರಕುಂಡಲೌ ಮೌನಿಸೇವಿತೌ ಮಣಿಕಿರೀಟಿನೌ ಮಂಜುಭಾಷಿಣೌ । ಮನುಕುಲೋದ್ಭವೌ ಮಾನುಷೋತ್ತಮೌ ರಹಸಿ ನೌಮಿ ತೌ ರಾಮಲಕ್ಷ್ಮಣೌ ॥ 2॥
ಸತ್ಯಸಂಗರೌ ಸಮರಭೀಕರೌ ಸರ್ವರಕ್ಷಕೌ ಸಾಹಸಾನ್ವಿತೌ । ಸದಯಮಾನಸೌ ಸರ್ವಪೂಜಿತೌ ರಹಸಿ ನೌಮಿ ತೌ ರಾಮಲಕ್ಷ್ಮಣೌ ॥ 3॥
ಧೃತಶಿಖಂಡಿನೌ ದೀನರಕ್ಷಣೌ ಧೃತಹಿಮಾಚಲೌ ದಿವ್ಯವಿಗ್ರಹೌ । ದಿವಿಜಪೂಜಿತೌ ದೀರ್ಘ ದೋರ್ಯುಗೌ ರಹಸಿ ನೌಮಿ ತೌ ರಾಮಲಕ್ಷ್ಮಣೌ ॥ 4॥
ಪವನಜಾನುಗೌ ಪಾದಚಾರಿಣೌ ಪಟುಶಿಲೀಮುಖೌ ಪಾವನಾಂಘ್ರಿಕೌ । ಪರಮಸಾತ್ತ್ವಿಕೌ ಭಕ್ತವತ್ಸಲೌ ರಹಸಿ ನೌಮಿ ತೌ ರಾಮಲಕ್ಷ್ಮಣೌ ॥ 5॥
ವನವಿಹಾರಿಣೌ ವಲ್ಕಲಾಮ್ಬರೌ ವನಫಲಾಶಿನೌ ವಾಸವಾರ್ಚಿತೌ । ವರಗುಣಾಕರೌ ಬಾಲಿಮರ್ದ್ದನೌ ರಹಸಿ ನೌಮಿ ತೌ ರಾಮಲಕ್ಷ್ಮಣೌ ॥ 6॥
ದಶರಥಾತ್ಮಜೌ ಪಶುಪತಿಪ್ರಿಯೌ ಶಶಿನಿಭಾನನೌ ವಿಶದಮಾನಸೌ । ದಶಮುಖಾನ್ತಕೌ ನಿಶಿತಸಾಯಕೌ ರಹಸಿ ನೌಮಿ ತೌ ರಾಮಲಕ್ಷ್ಮಣೌ ॥ 7॥
ಕಮಲಲೋಚನೌ ಸಮರಪಂಡಿತೌ ಭೀಮವಿಕ್ರಮೌ ಕಾಮಸುನ್ದರೌ । ದಾಮಭೂಷಣೌ ಹೇಮನೂಪುರೌ ರಹಸಿ ನೌಮಿ ತೌ ರಾಮಲಕ್ಷ್ಮಣೌ ॥ 8॥
ಭರತಸೇವಿತೌ ದುರಿತಮೋಚಕೌ ಕರಧೃತಾಶುಗೌ ಸುರವರಸ್ತುತೌ । ಶರಧಿಧಾರಣೌ ಧೀರಕವಚಿನೌ ರಹಸಿ ನೌಮಿ ತೌ ರಾಮಲಕ್ಷ್ಮಣೌ ॥ 9॥
ಧರ್ಮಚಾರಿಣೌ ಕರ್ಮಸಾಕ್ಷಿಣೌ ಧರ್ಮಕಾರಕೌ ಶರ್ಮದಾಯಕೌ । ನರ್ಮಶೋಭಿತೌ ಮರ್ಮ ಭೇದಿನೌ ರಹಸಿ ನೌಮಿ ತೌ ರಾಮಲಕ್ಷ್ಮಣೌ ॥ 10॥
ನೀಲದೇಹಿನೌ ಲೋಲಕುನ್ತಲೌ ಕಾಲಿಭೀಕರೌ ತಾಲಮರ್ದ್ದನೌ । ಕಲುಷಹಾರಿಣೌ ಲಲಿತಭಾಷಿಣೌ ರಹಸಿ ನೌಮಿ ತೌ ರಾಮಲಕ್ಷ್ಮಣೌ ॥ 11॥
ಮಾತೃನನ್ದನೌ ಪಾತ್ರಪಾಲಕೌ ಭ್ರಾತೃಸಮ್ಮತೌ ಶತ್ರುಸೂದನೌ । ಧಾತೃಶೇಖರೌ ಜೇತೃನಾಯಕೌ ರಹಸಿ ನೌಮಿ ತೌ ರಾಮಲಕ್ಷ್ಮಣೌ ॥ 12॥
ಜಲಧಿಬನ್ಧನೌ ದಲಿತದಾನವೌ ಕುಲವಿವರ್ಧನೌ ಬಲವಿರಾಜಿತೌ । ಶೈಲಜಾರ್ಚಿತೌ ಫಲವಿಧಾಯಕೌ ರಹಸಿ ನೌಮಿ ತೌ ರಾಮಲಕ್ಷ್ಮಣೌ ॥ 13॥
ರಾಜಲಕ್ಷಣೌ ವಿಜಯಕಾಂಕ್ಷಿಣೌ ಗಜವರಾರುಹೌ ಪೂಜಿತಾಮರೌ । ವಿಜಿತಮತ್ಸರೌ ಭಜಿತಶೂರಿಣೌ ರಹಸಿ ನೌಮಿ ತೌ ರಾಮಲಕ್ಷ್ಮಣೌ ॥ 14॥
ಶರ್ವಮಾನಿತೌ ಸರ್ವಕಾರಿಣೌ ಗರ್ವಭಂಜನೌ ನಿರ್ವಿಕಾರಿಣೌ । ದುರ್ವಿಭಾವಿತೌ ಸರ್ವ ಭಾಸಕೌ ರಹಸಿ ನೌಮಿ ತೌ ರಾಮಲಕ್ಷ್ಮಣೌ ॥ 15॥
ರವಿಕುಲೋದ್ಭವೌ ಭವವಿನಾಶಕೌ ಪವನಜಾಶ್ರಿತೌ ಪಾವಕೋಪಮೌ । ರವಿಸುತಪ್ರಿಯೌ ಕವಿಭಿರೀಡಿತೌ ರಹಸಿ ನೌಮಿ ತೌ ರಾಮಲಕ್ಷ್ಮಣೌ ॥ 16॥
ಮಣಿಕಿರೀಟಿನೌ ಮಾನುಷೋತ್ತಮೌ ಕನಕಕುಂಡಲೌ ದಿನಮಣಿಪ್ರಭೌ । ವಾನರಾರ್ಚಿತೌ ವನವಿಹಾರಿಣೌ ರಹಸಿ ನೌಮಿ ತೌ ರಾಮಲಕ್ಷ್ಮಣೌ ॥ 17॥
ಜನನವರ್ಜಿತೌ ಜನಕಜಾನ್ವಿತೌ ವನಜನಾನತೌ ದೀನವತ್ಸಲೌ । ಸನಕಸನ್ನುತೌ ಶೌನಕಾರ್ಚಿತೌ ರಹಸಿ ನೌಮಿ ತೌ ರಾಮಲಕ್ಷ್ಮಣೌ ॥ 18॥
ಯಾಗರಕ್ಷಕೌ ಯೋಗಚಿನ್ತಿತೌ ತ್ಯಾಗಮಾನಸೌ ಭೋಗಿಶಾಯಿನೌ । ನಾಗಗಾಮಿನೈ ನಿಗಮಗೋಚರೌ ರಹಸಿ ನೌಮಿ ತೌ ರಾಮಲಕ್ಷ್ಮಣೌ ॥ 19॥
ಸತ್ಯವಾದಿನೌ ಭೃತ್ಯಪಾಲಕೌ ಮೃತ್ಯುನಾಶಕೌ ಸತ್ಯರೂಪಿಣೌ । ಪ್ರತ್ಯಗಾತ್ಮಕೌ ಮುಕ್ತಿದಾಯಕೌ ರಹಸಿ ನೌಮಿ ತೌ ರಾಮಲಕ್ಷ್ಮಣೌ ॥ 20॥
ಮಣಿಮಯಾಂಗದೌ ಗುಣವಿಭೂಷಣೌ ಫಣಿಭುಗಾಸನೌ ಪುಣ್ಯಶಾಲಿನೌ । ಪೂರ್ಣವಿಗ್ರಹೌ ಪೂರ್ಣಬೋಧಕೌ ರಹಸಿ ನೌಮಿ ತೌ ರಾಮಲಕ್ಷ್ಮಣೌ ॥ 21॥
ರಾಮಲಕ್ಷ್ಮಣಾಂಕಿತಮಿದಂ ವರಂ ಗೀತಮವ್ಯಯಂ ಪಠತಿ ಯಃ ಪುಮಾನ್ । ತೇನ ತೋಷಿತೌ ತಸ್ಯ ಸಪದಂ ಕೀರ್ತ್ತಿಮಾಯುಷಂ ಯಚ್ಛತಸ್ಸುಖಮ್ ॥ 22॥
ಇತಿ ಶ್ರೀರಾಮಲಕ್ಷ್ಮಣಸ್ತೋತ್ರಂ ಸಂಪೂರ್ಣಂ
No comments:
Post a Comment