ರಾಗ: ಮಧ್ಯಮಾವತಿ ತಾಳ: ಆಟ
ಬಾರೋ ಮನೆಗೆ ಗೋವಿಂದ-ನಿನ್ನಂಘ್ರಿ ಕಮಲವ
ತೋರೋ ಎನೆಗೆ ಮುಕುಂದ-ನಲಿದಾಡು ಮನದಲಿ
ಮಾರಪಿತ ಆನಂದ-ನಂದನ್ನ ಕಂದ || ಪ ||
ಚಾರುತರ ಶರೀರ ಕರುಣಾ
ವಾರಿನಿಧಿ ಭವಘೋರನಾಶನ
ವಾರಿಜಾಸನವಂದ್ಯ ನೀರಜ
ಸಾರಸದ್ಗುಣ ಹೇ ರಮಾಪತಿ || ಅ.ಪ ||
ನೋಡು ದಯದಿಂದೆನ್ನ-ಕರಪದುಮ ಶಿರದಲಿ
ನೀಡು ಭಕ್ತಪ್ರಸನ್ನ-ನಲಿದಾಡು ಮನದಲಿ
ಬೇಡಿಕೊಂಬೆನೊ ನಿನ್ನ-ಆನಂದಘನ್ನ
ಮಾಡದಿರು ಅನುಮಾನವನು ಕೊಂ
ಡಾಡುವೆನು ತವ ಮಹಿಮೆಗಳನು
ಜೋಡಿಸುವೆನು ಕರಗಳನು ಚರಣಕೆ
ಕೊಡಿಸೋ ತವ ದಾಸಜನರೊಳು || ೧ ||
ಹೇಸಿ ವಿಷಯಗಳಲ್ಲೀ-ತೊಳಲಾಡಿ ನಾ ಬಲು
ಕ್ಲೇಶ ಪಡುವುದ ಬಲ್ಲೀ-ಧನಯುವತಿಗಳ ಸುಖ
ಲೇಸು ಎಂಬುದನು ಕೊಲ್ಲಿ-ಆಸೆ ಬಿಡಿಸಿಲ್ಲಿ
ಏಸುಜನುಮದ ದೋಷದಿಂದಲಿ
ಈಸುವೆನು ಇದರೊಳಗೆ ಇಂದಿಗೆ
ಮೋಸವಾಯಿತು ಆದುದಾಗಲಿ
ಶ್ರೀಶ ನೀ ಕೈ ಪಿಡಿದು ರಕ್ಷಿಸೋ || ೨ ||
ನೀನೆ ಗತಿ ಎನಗಿಂದು-ಉದ್ಧರಿಸೋ ಬೇಗನೆ
ದೀನಜನರಿಗೆ ಬಂಧು-ನಾ ನಿನ್ನ ಸೇವಕ
ಶ್ರೀನಿವಾಸನೆ ಹೃದಯಾಬ್ಜಮಂಟಪ
ಸ್ಥಾನದೊಳಗಭಿವ್ಯಾಪ್ತ ಚಿನ್ಮಯ
ಧ್ಯಾನಗೋಚರನಾಗಿ ಕಣ್ಣಿಗೆ
ಕಾಣಿಸುತ ಶ್ರೀರಂಗವಿಠ್ಠಲ || ೩ ||
......ಶ್ರೀರಂಗವಿಠ್ಠಲ
No comments:
Post a Comment