BhadradriRama Stotram ಶ್ರೀ ಭದ್ರಾದ್ರಿರಾಮ ಸ್ತೋತ್ರಂ

BhadradriRama Stotram

ಶ್ರೀ ಭದ್ರಾದ್ರಿರಾಮ ಸ್ತೋತ್ರಂ 

ಶ್ರೀ ಗುರುಭ್ಯೋ ನಮಃ. ಹರಿ ಓಂ 

ವಾಮಾಂಕಸ್ಥಿತಜಾನಕೀಪರಿಲಸತ್ಕೋದಂಡದಂಡಂ ಕರೇ | ಚಕ್ರಂ ಚೋರ್ಧ್ವಕರೇಣ ಬಾಹುಯುಗಲೇ ಶಂಖಂ ಶರಂ ದಕ್ಷಿಣೇ । ಬಿಭ್ರಾಣಂ ಜಲಜಾತಪತ್ರ ನಯನಂ ಭದ್ರಾದ್ರಿಮೂರ್ಧಸ್ಥಿತಂ| ಕೇಯೂರಾದಿ ವಿಭೂಷಿತಂ ರಘುಪತಿಂ ಸೌಮಿತ್ರಿಯುಕ್ತಂ ಭಜೇ ॥ 1॥

ಶ್ರೀಮಚ್ಚನ್ದನಚರ್ಚಿತೋನ್ನತಕುಚ ವ್ಯಾಲೋಲ ಮಾಲಾಂಕಿತಾಂ |ತಾಟಂಕದ್ಯುತಿಸತ್ಕಪೋಲಯುಗಲಾಂ ಪೀತಾಮ್ಬರಾಲಂಕೃತಾಮ್ । ಕಾಂಚೀಕಂಕಣ ಹಾರನೂಪುರ ಲಸತ್ಕಲ್ಯಾಣದಾಮಾನ್ವಿತಾಂ. | ಶ್ರೀ ವಾಮಾಂಕ ಗತಾಂ ಸರೋರುಹಕರಾಂ ಸೀತಾಂ ಮೃಗಾಕ್ಷೀಂ ಭಜೇ ॥ 2॥

ದ್ವಿಭುಜಂ ಸ್ವರ್ಣವಪುಷಂ ಪದ್ಮಪತ್ರನಿಭೇಕ್ಷಣಮ್ ।
ಧನುರ್ಬಾಣಧರಂ ಧೀರಂ ರಾಮಾನುಜಮಹಂ ಭಜೇ ॥ 3॥

ಕೌಸಲ್ಯಾ ಸುಪ್ರಜಾ ರಾಮ ಪೂರ್ವಾ ಸನ್ಧ್ಯಾ ಪ್ರವರ್ತತೇ । ಉತ್ತಿಷ್ಠ ನರಶಾರ್ದೂಲ ಕರ್ತವ್ಯಂ ದೈವಮಾಹ್ನಿಕಮ್ ॥ |ಉತ್ತಿಷ್ಠೋತ್ತಿಷ್ಠ ಗೋವಿನ್ದ ಉತ್ತಿಷ್ಠ ಗರುಡಧ್ವಜ ।
ಉತ್ತಿಷ್ಠ ಕಮಲಾಕಾನ್ತ ತ್ರೈಲೋಕ್ಯಂ ಮಂಗಲಂ ಕುರು ॥ 4॥

ವನ್ದೇ ಶ್ರೀರಘುನನ್ದನಂ  ಜನಕಜಾ ನೇತ್ರಾಸಿ ತಾಮ್ಭೋರುಹಂ|ಪ್ರಾಲೇಯಾಮ್ಬುಮನಲ್ಪ ಮಂಜುಲಗುಣಂ ಪದ್ಮಾಸನೋದ್ಭಾಸಿನಮ್ ।
ಚಕ್ರಾಬ್ಜೇಷುಶರಾಸನಾನಿ ದಧತಂ ಹಸ್ತಾರವಿನ್ದೋತ್ತಮೈಃ
ಶ್ರೀಮನ್ಮಾರುತಿಪೂಜಿತಾಂಘ್ರಿಯುಗಲಂ ಭದ್ರಾದ್ರಿ ಚಿನ್ತಾಮಣಿಮ್ ॥ 5॥

ಶ್ರೀರಾಮಚನ್ದ್ರವರಕೌಮುದಿ ಭಕ್ತಲೋಕ ಕಲ್ಪಾಖ್ಯ ವಲ್ಲರಿವಿನತಜನೈಕಬನ್ಧೋ ।  ವಿನಮ್ರಜನೈಕಬನ್ಧೋ
ಕಾರುಣ್ಯಪೂರಪರಿಪೂರಿತಸತ್ಕಟಾಕ್ಷೇ |ಭದ್ರಾದ್ರಿನಾಧ ದಯಿತೇ ತವ ಸುಪ್ರಭಾತಮ್ ॥ 6॥

ಅಮ್ಲಾನಭಕ್ತಿಕುಸುಮಾ ಮಲಿನಾಃ ಪ್ರದೀಪಾಃ
     ಸೌಧಾನ್ ಜಯತ್ಯವಿರಲಾಗುರುಧೂಮರಾಜಿಃ ।
ನಾಕಂ ಸ್ವೃಶನ್ತಿ ಧರಣೀಸುರವೇದನಾದಾಃ
     ಭದ್ರಾದ್ರಿಶೇಖರ ವಿಭೋ ತವ ಸುಪ್ರಭಾತಮ್ ॥ 7॥

ಸಾನ್ದ್ರೋಡುರಮ್ಯಸುಷಮಾ ನ ವಿಭಾತಿರಾಜಾ
     ದೀನೋ ಯಥಾ ಗತವಸುರ್ಮಲಿನಾನ್ತರಂಗಃ ।
ದೈನ್ಯಂ ಗತಾ ಕುಮುದಿನೀ ಪ್ರಿಯವಿಪ್ರಯೋಗಾತ್
     ಭದ್ರಾದ್ರಿಶೇಖರ ವಿಭೋ ತವ ಸುಪ್ರಭಾತಮ್ ॥ 8॥

ಪೂರ್ವಾದ್ರಿಪೀಠಮಧಿತಿಷ್ಠತಿ ಭಾನುಬಿಮ್ಬಂ
     ಗಾಢಂ ಪ್ರಯಾತಿ ತಿಮಿರಂ ಕಕುಭಃ ಪ್ರಸನ್ನಾಃ ।
ತ್ವತ್ಸ್ವಾಗತಂ ಖಗರುತೈಃ ಕಥಯನ್ತಿ ಮನ್ದ್ರಂ
 ಭದ್ರಾದ್ರಿಶೇಖರ ವಿಭೋ ತವ ಸುಪ್ರಭಾತಮ್ ॥ 9॥

ಆದಿತ್ಯಲೋಲಕರಲಾಲನಜಾತಹರ್ಷಾ
     ಸಾ ಪದ್ಮಿನೀ ತ್ಯಜತಿ ಮಾ ಸಕೃದಾಸ್ಯಮುದ್ರಾಮ್ ।
ಭೃಂಗಾವಲೀ ವಿಶತಿ ಚಾಟುವಚಾಸ್ಸರೋಜಂ
 ಭದ್ರಾದ್ರಿಶೇಖರ ವಿಭೋ ತವ ಸುಪ್ರಭಾತಮ್ ॥ 10॥

ಪ್ರಾಲೇಯಬಿನ್ದುನಿಕರಾ ನವಪಲ್ಲವೇಷು
     ಬಿಮ್ಬಾಧರೇ ಸ್ಮಿತರುಚಿಂ ತವ ಸಂವದನ್ತಿ ।
ಆಯಾನ್ತಿ ಚಕ್ರಮಿಥುನಾನಿ ಗೃಹಸ್ಥಭಾವಂ  
ಭದ್ರಾದ್ರಿಶೇಖರ ವಿಭೋ ತವ ಸುಪ್ರಭಾತಮ್ ॥ 11॥

ಆನೇತುಮಾಸ್ಯಪವನಂ ತವ ಸತ್ಸುಗನ್ಧೀ
     ಮಾಲ್ಯಾನಿ ಜಾತಿಕುಸುಮಾನಿ ಸರೋರುಹಾಣಿ ।
ಆಮರ್ದಯನ್ ಸುರಭಿಗನ್ಧಮಹೋ ಭಿವಾತಿ
ಭದ್ರಾದ್ರಿಶೇಖರ ವಿಭೋ ತವ ಸುಪ್ರಭಾತಮ್ ॥ 12॥

ಗೋಪೀಕರಾಕಲಿತಮನ್ಥನರಮ್ಯನಾದಾಃ
     ಗೋಪಾಲವೇಣುನಿನದೇನ ಸಮಂ ಪ್ರವೃತ್ತಾಃ ।
ಧುನ್ವನ್ತಿ ಹಂಸಮಿಥುನಾನಿ ತುಷಾರಪಕ್ಷಾನ್
ಭದ್ರಾದ್ರಿಶೇಖರ ವಿಭೋ ತವ ಸುಪ್ರಭಾತಮ್ ॥ 13॥

ಸ್ತಮ್ಭೇ ರಮಾ ಉಭಯಪಕ್ಷವಿನೀತನಿದ್ರಾಃ
     ಕರ್ಷನ್ತಿ ತೇ ಕಲಿತಘೀಂಕೃತಿಶ‍ೃಂಖಲಾನಿ ।
ವಾದ್ಯಾ ಮುಖೋಷ್ಮಮಲಿನೀಕೃತಸೈನ್ಧವಾಂಶಾಃ
ಭದ್ರಾದ್ರಿಶೇಖರ ವಿಭೋ ತವ ಸುಪ್ರಭಾತಮ್ ॥ 14॥

ಶ್ರೀವನ್ದಿನಸ್ತವ ಪಠನ್ತಿ ಚ ಮಂಜುಕಂಠೈಃ
     ರಮ್ಯಾವಧಾನಚರಿತಾನ್ಯಮೃತೋಪಮಾನಿ ।
ಮನ್ದ್ರಂ ನದನ್ತಿ ಮುರಜಾಶ್ಶುಭಶಂಖನಾದೈಃ
ಭದ್ರಾದ್ರಿಶೇಖರ ವಿಭೋ ತವ ಸುಪ್ರಭಾತಮ್ ॥ 15॥

ಉತ್ತಾನಕೇತನರತಾ ರವಯೋ ಮಹೇಶಾಃ
     ಶುದ್ಧೋಕ್ಷವಾಹನಗತಾ ವಸವೋಽಪಿ ಸಿದ್ಧಾಃ ।
ದ್ವಾರೇ ವಸನ್ತಿ ತವ ದರ್ಶನಲಾಲಸಾಸ್ತೇ
ಭದ್ರಾದ್ರಿಶೇಖರ ವಿಭೋ ತವ ಸುಪ್ರಭಾತಮ್ ॥ 16॥

 ಚಕ್ರಾಂಗವಾಹವಿಧಿರೇಷ ಸುರೇಶ್ವರೋಽಯಂ
     ದೇವರ್ಷಿಭಿರ್ಮುನಿಗಣೈಸ್ಸಹ ಲೋಕಪಾಲೈಃ ।
ರತ್ನೋಪದಾಂಜಲಿಭರೋಽಭಿಮುಖಂ ಸಮಾಸ್ತೇ
ಭದ್ರಾದ್ರಿಶೇಖರ ವಿಭೋ ತವ ಸುಪ್ರಭಾತಮ್ ॥ 17॥

ದಾತುಂ ಭವಾನ್ ವಿವಿಧಗೋಧನರತ್ನಪೂಗಾನ್
     ಆಲೋಕನಾಯ ಮುಕುರಾದಿ ಶುಭಾರ್ಥಪುಂಜಾನ್ ।ಆದಾಯ ದೇಹಲಿತಲೇ ತ್ರಿದಶಾ ನಿಷಣ್ಣಾಃ
ಭದ್ರಾದ್ರಿಶೇಖರ ವಿಭೋ ತವ ಸುಪ್ರಭಾತಮ್ ॥ 18॥

ಗೋದಾವರೀವಿಮಲವಾರಿಸಮುದ್ಭವಾನಿ
     ನಿರ್ಹಾರಿಪುಷ್ಪವಿಸರಾಣಿ ಮುದಾ ಹರನ್ತಃ ।
ಶುಶ್ರೂಷಯಾ ತವ ಬುಧಾಃ ಪ್ರತಿಪಾಲಯನ್ತಿ
ಭದ್ರಾದ್ರಿಶೇಖರ ವಿಭೋ ತವ ಸುಪ್ರಭಾತಮ್ ॥ 19॥

ಏಲಾಲವಂಗವರಕುಂಕುಮಕೇಸರಾದ್ಯೈಃ
     ಪುನ್ನಾಗನಾಗತುಲಸೀವಕುಲಾದಿಪುಷ್ಪೈಃ ।
ನೀತಾಸ್ಸುತೀರ್ಥಕಲಶಾ ಅಭಿಷೇಚನಾಯ
ಭದ್ರಾದ್ರಿಶೇಖರ ವಿಭೋ ತವ ಸುಪ್ರಭಾತಮ್ ॥ 20॥

ಕಸ್ತೂರಿಕಾಸುರಭಿಚನ್ದನಪದ್ಮಮಾಲಾಃ
     ಪೀತಾಮ್ಬರಂ ಚ ತಡಿದಾಭಮನಲ್ಪಮೂಲ್ಯಮ್ ।
ಸಜ್ಜೀಕೃತಾನಿ ರಘುನಾಯಕ ಮಂಜುಲಾನಿ
ಭದ್ರಾದ್ರಿಶೇಖರ ವಿಭೋ ತವ ಸುಪ್ರಭಾತಮ್ ॥ 21॥

ಕೇಯೂರಕಂಕಣಕಲಾಪಕಿರೀಟದೇವ
     ಛನ್ದಾಂಗುಲೀಯಕಮುಖಾ ನವರತ್ನಭೂಷಾಃ ।
ರಾಜನ್ತಿ ತಾವಕಪುರೋ ರವಿಕಾನ್ತಿಕಾನ್ತಾಃ
ಭದ್ರಾದ್ರಿಶೇಖರ ವಿಭೋ ತವ ಸುಪ್ರಭಾತಮ್ ॥ 22॥

ಗೋದಾವರೀಸಲಿಲಸಮ್ಪ್ಲವನಿರ್ಮಲಾಂಗಾಃ
     ದೀಪ್ತೋರ್ಧ್ವಪುಂಡ್ರತುಲಸೀನಲಿನಾಕ್ಷಮಾಲಾಃ ।
ಶ್ರೀವೈಷ್ಣವಾಸ್ತವ ಪಠನ್ತಿ ವಿಬೋಧಗಾಥಾಃ
ಭದ್ರಾದ್ರಿಶೇಖರ ವಿಭೋ ತವ ಸುಪ್ರಭಾತಮ್ ॥ 23॥

ಸ್ವರ್ಲೋಕವಾರವನಿತಾಸ್ಸುರಲೋಕತೋಽಮೀ
     ರಮ್ಭಾದಯೋ ವಿಮಲಮಂಗಲಕುಮ್ಭದೀಪೈಃ ।
ಸಂಘೀಭವನ್ತಿ ಭವದಂಗಣಪೂರ್ವಭಾಗೇ
ಭದ್ರಾದ್ರಿಶೇಖರ ವಿಭೋ ತವ ಸುಪ್ರಭಾತಮ್ ॥ 24॥

ಸೀತಾಪ್ರವಾಲಸುಮನೋಹರಪಾಣಿಯುಗ್ಮ-
     ಸಂವಾಹಿತಾತ್ಮಪದಪಂಕಜಪದ್ಮನೇತ್ರ ।
ಸೌಮಿತ್ರಿಸಾದರಸಮರ್ಪಿತಸೌಮ್ಯಶಯ್ಯಾ
ಭದ್ರಾದ್ರಿಶೇಖರ ವಿಭೋ ತವ ಸುಪ್ರಭಾತಮ್ ॥ 25॥

ಶ್ರೀಶೇಷತಲ್ಪ ಶರಣಾಗತರಕ್ಷಕಾರ್ಕ-
     ವಂಶೇ ನಿಶಾಚರವಧಾಯ ಕೃತಾವತಾರ ।
ಪಾದಾಬ್ಜರೇಣುಹೃತಗೌತಮದಾರಶಾಪ
ಭದ್ರಾದ್ರಿಶೇಖರ ವಿಭೋ ತವ ಸುಪ್ರಭಾತಮ್ ॥ 26॥

ಪಾಠೀನಕೂರ್ಮಕಿಟಿಮಾನುಷಸಿಂಹವೇಷ
     ಕುಬ್ಜಾವತಾರ ಭೃಗುನನ್ದನ ರಾಘವೇನ್ದ್ರ ।
ತಾಲಾಂಕಕೃಷ್ಣಯವನಾನ್ತಕಬುದ್ಧರೂಪ
ಭದ್ರಾದ್ರಿಶೇಖರ ವಿಭೋ ತವ ಸುಪ್ರಭಾತಮ್ ॥ 27॥

ಬ್ರಹ್ಮಾದಿಸರ್ವವಿಬುಧಾಂಸ್ತವ ಪಾದಭಕ್ತಾನ್
     ಸಮ್ಫುಲ್ಲತಾಮರಸಭಾಸುರಲೋಚನಾದ್ಯೈಃ ।
ಆನನ್ದಯಸ್ವ ರಿಪುಶೋಧನ ಚಾಪಧಾರಿನ್
ಭದ್ರಾದ್ರಿಶೇಖರ ವಿಭೋ ತವ ಸುಪ್ರಭಾತಮ್ ॥ 28॥

ತಲ್ಪಂ ವಿಹಾಯ ಕೃಪಯಾ ವರಭದ್ರಪೀಠಂ
     ಆಸ್ಥಾಯ ಪೂಜನಮಶೇಷಮಿದಂ ಗೃಹೀತ್ವಾ ।
ಭಕ್ತಾನಶೇಷಭುವನಾನಿ ಚ ಪಾಲಯಸ್ವ
ಭದ್ರಾದ್ರಿಶೇಖರ ವಿಭೋ ತವ ಸುಪ್ರಭಾತಮ್ ॥ 29॥

ಕುನ್ದಸುನ್ದರದನ್ತಪಂಕ್ತಿವಿಭಾಸಮಾನಮುಖಾಮ್ಬುಜಂ
ನೀಲನೀರದಕಾಯಶೋಭಿತಜಾನಕೀತಡಿದುಜ್ಜ್ವಲಮ್ । ಶಂಖಚಕ್ರಶರಾಸನೇಷುವಿರಾಜಮಾನಕರಾಮ್ಬುಜಂ
ಭದ್ರಭೂಧರಶೇಖರಂ ಪ್ರಣಮಾಮಿ ರಾಮ ಸುಧಾಕರಮ್ ॥ 30॥

ಅಬ್ಜಸಮ್ಭವಶಂಕರಾದಿಭಿರರ್ಚಿತಾಂಘ್ರಿಪಯೋರುಹಂ
ನಮೇರುನನ್ದನಭದ್ರತಾಪಸಮಾನಸಾಬ್ಜದಿವಾಕರಮ್ ।
ನಮ್ರಭಕ್ತಜನೇಷ್ಟದಾಯಕಪದ್ಮಪೀಠಸಮಾಸ್ಥಿತಂ
ಗೌತಮೀಕ್ಷಣಲಾಲಸಂ ಪ್ರಣಮಾಮಿ ರಾಮ ಸುಧಾಕರಮ್ ॥ 31॥

ಭೀತಭಾನುತನೂಭವಾರ್ತಿನಿವಾರಣಾತಿವಿಶಾರದಂ
ಪಾದನಮ್ರವಿಭೀಷಣಾಹಿತವೈರಿರಾಜ್ಯವಿಭೂತಿಕಮ್ ।
ಭೀಮರಾವಣಮತ್ತವಾರಣಸಿಂಹಮುತ್ತಮವಿಗ್ರಹಂ
ಭದ್ರಭೂಧರಶೇಖರಂ ಪ್ರಣಮಾಮಿ ರಾಮ ಸುಧಾಕರಮ್ ॥ 32॥

ಘೋರಸಂಸೃತಿದುಸ್ತರಾಮ್ಬುಧಿ ಕುಮ್ಭವಸಮ್ಭವಸನ್ನಿಭಂ
ಯೋಗಿವೃನ್ದಮನೋಽರವಿನ್ದಸುಕೇಸರೋಜ್ಜ್ವಲಷಟ್ಪದಮ್ ಭಕ್ತಲೋಕವಿಲೋಚನಾಮೃತ ವರ್ತಿಕಾ ಯಿತವಿಗ್ರಹಂ ಭದ್ರಭೂಧರಶೇಖರಂ ಪ್ರಣಮಾಮಿ ರಾಮಸುಧಾಕರಮ್ ॥ 33॥

ಭೂಸುತಾಚಿರರೋಚಿಷಂ ವರಸತ್ಪಥೈಕವಿಹಾರಿಣಂ
     ತಾಪನಾಶನದೀಕ್ಷಿತಂ ನತಚಾತಕಾವಲಿರಕ್ಷಕಮ್ ।
ಚಿತ್ರಚಾಪಕೃಪಾಮ್ಬುಮಂಡಲನೀಲವಿಗ್ರಹಭಾಸುರಂ
ಭದ್ರಭೂಧರಶೇಖರಂ ಪ್ರಣಮಾಮಿ ರಾಮ ಪಯೋಧರಮ್ ॥ 34॥

ಇತಿಶ್ರೀ ಭದ್ರಾದ್ರಿರಾಮ (ಭದ್ರಾಚಲರಾಮ) ಸ್ತೋತ್ರಂ ಸಮ್ಪೂರ್ಣಮ್ ।

ಶ್ರೀ ಕೃಷ್ಣಾರ್ಪಣಮಸ್ತು