Gajanana Stotram ಶ್ರೀ ಗಜಾನನ ಸ್ತೋತ್ರಂ ದೇವರ್ಷಿ ಕೃತ

(ದೇವರ್ಷಿ ಕೃತಂ)

ಶ್ರೀ ಗಜಾನನ ಸ್ತೋತ್ರಂ 

ಶ್ರೀ ಗುರುಭ್ಯೋ ನಮಃ ಹರಿ ಓಂ 

ದೇವರ್ಷಯ ಊಚುಃ |
ವಿದೇಹರೂಪಂ ಭವಬಂಧಹಾರಂ
ಸದಾ ಸ್ವನಿಷ್ಠಂ ಸ್ವಸುಖಪ್ರದಂ ತಂ |
ಅಮೇಯಸಾಂಖ್ಯೇನ ಚ ಲಭ್ಯಮೀಶಂ
ಗಜಾನನಂ ಭಕ್ತಿಯುತಾ ಭಜಾಮಃ ||1||

ಮುನೀಂದ್ರವಂದ್ಯಂ ವಿಧಿಬೋಧಹೀನಂ
ಸುಬುದ್ಧಿದಂ ಬುದ್ಧಿಧರಂ ಪ್ರಶಾಂತಂ |
ವಿಕಾಲಹೀನಂ ಸಕಲಾಂತಗಂ ವೈ
ಗಜಾನನಂ ಭಕ್ತಿಯುತಾ ಭಜಾಮಃ ||2||

ಅಮೇಯರೂಪಂ ಹೃದಿ ಸಂಸ್ಥಿತಂ ತಂ
ಬ್ರಹ್ಮಾಹಮೇಕಂ ಭ್ರಮನಾಶಕಾರಂ |
ಅನಾದಿಮಧ್ಯಾಂತಮಪಾರರೂಪಂ
ಗಜಾನನಂ ಭಕ್ತಿಯುತಾ ಭಜಾಮಃ ||3||

ಜಗತ್ಪ್ರಮಾಣಂ ಜಗದೀಶಮೇವ-
-ಮಗಮ್ಯಮಾದ್ಯಂ ಜಗದಾದಿಹೀನಂ |
ಅನಾತ್ಮನಾಂ ಮೋಹಪ್ರದಂ ಪುರಾಣಂ
ಗಜಾನನಂ ಭಕ್ತಿಯುತಾ ಭಜಾಮಃ ||4||

ನ ಭೂರ್ನ ರೂಪಂ ನ ಜಲಂ ಪ್ರಕಾಶಂ
ನ ತೇಜಸಿಸ್ಥಂ ನ ಸಮೀರಣಸ್ಥಂ |
ನ ಖೇ ಗತಂ ಪಂಚವಿಭೂತಿಹೀನಂ
ಗಜಾನನಂ ಭಕ್ತಿಯುತಾ ಭಜಾಮಃ ||5||

ನ ವಿಶ್ವಗಂ ತೈಜಸಗಂ ನ ಪ್ರಾಜ್ಞಂ
ಸಮಷ್ಟಿವ್ಯಷ್ಟಿಸ್ಥಮನಂತಗಂ ನ |
ಗುಣೈರ್ವಿಹೀನಂ ಪರಮಾರ್ಥಭೂತಂ
ಗಜಾನನಂ ಭಕ್ತಿಯುತಾ ಭಜಾಮಃ ||6||

ಗುಣೇಶಗಂ ನೈವ ಚ ಬಿಂದುಸಂಸ್ಥಂ
ನ ದೇಹಿನಂ ಬೋಧಮಯಂ ನ ಢುಂಢಿಂ |
ಸಂಯೋಗಹೀನಾಃ ಪ್ರವದಂತಿ ತತ್ಸ್ಥಂ
ಗಜಾನನಂ ಭಕ್ತಿಯುತಾ ಭಜಾಮಃ ||7||

ಅನಾಗತಂ ನೈವ ಗತಂ ಗಣೇಶಂ
ಕಥಂ ತದಾಕಾರಮಯಂ ವದಾಮಃ |
ತಥಾಪಿ ಸರ್ವಂ ಪ್ರಭುದೇಹಸಂಸ್ಥಂ
ಗಜಾನನಂ ಭಕ್ತಿಯುತಾ ಭಜಾಮಃ ||8||

ಯದಿ ತ್ವಯಾ ನಾಥ ಕೃತಂ ನ ಕಿಂಚಿ-
-ತ್ತದಾ ಕಥಂ ಸರ್ವಮಿದಂ ವಿಭಾತಿ |
ಅತೋ ಮಹಾತ್ಮಾನಮಚಿಂತ್ಯಮೇವ
ಗಜಾನನಂ ಭಕ್ತಿಯುತಾ ಭಜಾಮಃ ||9||

ಸುಸಿದ್ಧಿದಂ ಭಕ್ತಜನಸ್ಯ ದೇವಂ
ಸ ಕಾಮಿಕಾನಾಮಿಹ ಸೌಖ್ಯದಂ ತಂ |
ಅಕಾಮಿಕಾನಾಂ ಭವಬಂಧಹಾರಂ
ಗಜಾನನಂ ಭಕ್ತಿಯುತಾ ಭಜಾಮಃ ||10||

ಸುರೇಂದ್ರಸೇವ್ಯಂ ಹ್ಯಸುರೈಃ ಸುಸೇವ್ಯಂ
ಸಮಾನಭಾವೇನ ವಿರಾಜಯಂತಂ |
ಅನಂತವಾಹಂ ಮುಷಕಧ್ವಜಂ ತಂ
ಗಜಾನನಂ ಭಕ್ತಿಯುತಾ ಭಜಾಮಃ ||11||

ಸದಾ ಸುಖಾನಂದಮಯೇ ಜಲೇ ಚ
ಸಮುದ್ರಜೇ ಚೇಕ್ಷುರಸೇ ನಿವಾಸಂ |
ದ್ವಂದ್ವಸ್ಯ ಪಾನೇನ ಚ ನಾಶರೂಪೇ
ಗಜಾನನಂ ಭಕ್ತಿಯುತಾ ಭಜಾಮಃ ||12||

ಚತುಃಪದಾರ್ಥಾ ವಿವಿಧಪ್ರಕಾಶಾ-
-ಸ್ತ ಏವ ಹಸ್ತಾಃ ಸ ಚತುರ್ಭುಜಂ ತಂ |
ಅನಾಥನಾಥಂ ಚ ಮಹೋದರಂ ವೈ
ಗಜಾನನಂ ಭಕ್ತಿಯುತಾ ಭಜಾಮಃ ||13||

ಮಹಾಖುಮಾರೂಢಮಕಾಲಕಾಲಂ
ವಿದೇಹಯೋಗೇನ ಚ ಲಭ್ಯಮಾನಂ |
ಅಮಾಯಿನಂ ಮಾಯಿಕಮೋಹದಂ ತಂ
ಗಜಾನನಂ ಭಕ್ತಿಯುತಾ ಭಜಾಮಃ ||14||

ರವಿಸ್ವರೂಪಂ ರವಿಭಾಸಹೀನಂ
ಹರಿಸ್ವರೂಪಂ ಹರಿಬೋಧಹೀನಂ |
ಶಿವಸ್ವರೂಪಂ ಶಿವಭಾಸನಾಶಂ
ಗಜಾನನಂ ಭಕ್ತಿಯುತಾ ಭಜಾಮಃ ||15||

ಮಹೇಶ್ವರೀಸ್ಥಂ ಚ ಸುಶಕ್ತಿಹೀನಂ
ಪ್ರಭುಂ ಪರೇಶಂ ಪರವಂದ್ಯಮೇವಂ |
ಅಚಾಲಕಂ ಚಾಲಕಬೀಜಭೂತಂ
ಗಜಾನನಂ ಭಕ್ತಿಯುತಾ ಭಜಾಮಃ ||16||

ಶಿವಾದಿದೇವೈಶ್ಚ ಖಗೈಃ ಸುವಂದ್ಯಂ
ನರೈರ್ಲತಾವೃಕ್ಷಪಶುಪ್ರಭೂಭಿಃ |
ಚರಾಚರೈರ್ಲೋಕವಿಹೀನಮೇವಂ
ಗಜಾನನಂ ಭಕ್ತಿಯುತಾ ಭಜಾಮಃ ||17||

ಮನೋವಚೋಹೀನತಯಾ ಸುಸಂಸ್ಥಂ
ನಿವೃತ್ತಿಮಾತ್ರಂ ಹ್ಯಜಮವ್ಯಯಂ ತಂ |
ತಥಾಪಿ ದೇವಂ ಪುರ ಆಸ್ಥಿತಂ ತಂ
ಗಜಾನನಂ ಭಕ್ತಿಯುತಾ ಭಜಾಮಃ ||18||

ವಯಂ ಸುಧನ್ಯಾ ಗಣಪಸ್ತವೇನ
ತಥೈವ ನತ್ಯಾರ್ಚನತಸ್ತವೈವ |
ಗಣೇಶರೂಪಾಶ್ಚ ಕೃತಾಸ್ತ್ವಯಾ ತಂ
ಗಜಾನನಂ ಭಕ್ತಿಯುತಾ ಭಜಾಮಃ ||19||

ಗಜಾಖ್ಯಬೀಜಂ ಪ್ರವದಂತಿ ವೇದಾ-
-ಸ್ತದೇವ ಚಿಹ್ನೇನ ಚ ಯೋಗಿನಸ್ತ್ವಾಂ |
ಗಚ್ಛಂತಿ ತೇನೈವ ಗಜಾನನಸ್ತ್ವಂ
ಗಜಾನನಂ ಭಕ್ತಿಯುತಾ ಭಜಾಮಃ ||20||

ಪುರಾಣವೇದಾಃ ಶಿವವಿಷ್ಣುಕಾದ್ಯಾ-
-ಽಮರಾಃ ಶುಕಾದ್ಯಾ ಗಣಪಸ್ತವೇ ವೈ |
ವಿಕುಂಠಿತಾಃ ಕಿಂ ಚ ವಯಂ ಸ್ತವಾಮ
ಗಜಾನನಂ ಭಕ್ತಿಯುತಾ ಭಜಾಮಃ ||21||

ಮುದ್ಗಲ ಉವಾಚ |
ಏವಂ ಸ್ತುತ್ವಾ ಗಣೇಶಾನಂ ನೇಮುಃ ಸರ್ವೇ ಪುನಃ ಪುನಃ |
ತಾನುತ್ಥಾಪ್ಯ ವಚೋ ರಮ್ಯಂ ಗಜಾನನ ಉವಾಚ ಹ ||22||

ಗಜಾನನ ಉವಾಚ |
ವರಂ ಬ್ರೂತ ಮಹಾಭಾಗಾ ದೇವಾಃ ಸರ್ಷಿಗಣಾಃ ಪರಂ |
ಸ್ತೋತ್ರೇಣ ಪ್ರೀತಿಸಂಯುಕ್ತಃ ಪರಂ ದಾಸ್ಯಾಮಿ ವಾಂಛಿತಂ ||23||

ಗಜಾನನವಚಃ ಶ್ರುತ್ವಾ ಹರ್ಷಯುಕ್ತಾಃ ಸುರರ್ಷಯಃ |
ಜಗುಸ್ತಂ ಭಕ್ತಿಭಾವೇನ ಸಾಶ್ರುನೇತ್ರಾಃ ಪ್ರಜಾಪತೇ ||24||

ದೇವರ್ಷಯ ಊಚುಃ |
ಗಜಾನನ ಯದಿ ಸ್ವಾಮಿನ್ ಪ್ರಸನ್ನೋ ವರದೋಽಸಿ ಭೋಃ |
ತದಾ ಭಕ್ತಿಂ ದೃಢಾಂ ದೇಹಿ ಲೋಭಹೀನಾಂ ತ್ವದೀಯಕಾಂ ||25||

ಲೋಭಾಸುರಸ್ಯ ದೇವೇಶ ಕೃತಾ ಶಾಂತಿಃ ಸುಖಪ್ರದಾ |
ತದಾ ಜಗದಿದಂ ಸರ್ವಂ ವರಯುಕ್ತಂ ಕೃತಂ ತ್ವಯಾ ||26||

ಅಧುನಾ ದೇವದೇವೇಶ ಕರ್ಮಯುಕ್ತಾ ದ್ವಿಜಾದಯಃ |
ಭವಿಷ್ಯಂತಿ ಧರಾಯಾಂ ವೈ ವಯಂ ಸ್ವಸ್ಥಾನಗಾಸ್ತಥಾ ||27||

ಸ್ವಸ್ವಧರ್ಮರತಾಃ ಸರ್ವೇ ಗಜಾನನ ಕೃತಾಸ್ತ್ವಯಾ |
ಅತಃಪರಂ ವರಂ ಯಾಚಾಮಹೇ ಢುಂಢೇ ಕಮಪ್ಯಹೋ ||28||

ಯದಾ ತೇ ಸ್ಮರಣಂ ನಾಥ ಕರಿಷ್ಯಾಮೋ ವಯಂ ಪ್ರಭೋ |
ತದಾ ಸಂಕಟಹೀನಾನ್ ವೈ ಕುರು ತ್ವಂ ನೋ ಗಜಾನನ ||29||

ಏವಮುಕ್ತ್ವಾ ಪ್ರಣೇಮುಸ್ತಂ ಗಜಾನನಮನಾಮಯಂ |
ಸ ತಾನುವಾಚ ಪ್ರೀತಾತ್ಮಾ ಭಕ್ತ್ಯಧೀನಸ್ವಭಾವತಃ ||30||

ಗಜಾನನ ಉವಾಚ |
ಯದ್ಯಚ್ಚ ಪ್ರಾರ್ಥಿತಂ ದೇವಾ ಮುನಯಃ ಸರ್ವಮಂಜಸಾ |
ಭವಿಷ್ಯತಿ ನ ಸಂದೇಹೋ ಮತ್ಸ್ಮೃತ್ಯಾ ಸರ್ವದಾ ಹಿ ವಃ ||31||

ಭವತ್ಕೃತಮದೀಯಂ ವೈ ಸ್ತೋತ್ರಂ ಸರ್ವತ್ರ ಸಿದ್ಧಿದಂ |
ಭವಿಷ್ಯತಿ ವಿಶೇಷೇಣ ಮಮ ಭಕ್ತಿಪ್ರದಾಯಕಂ ||32||

ಪುತ್ರಪೌತ್ರಪ್ರದಂ ಪೂರ್ಣಂ ಧನಧಾನ್ಯವಿವರ್ಧನಂ |
ಸರ್ವಸಂಪತ್ಕರಂ ದೇವಾಃ ಪಠನಾಚ್ಛ್ರವಣಾನ್ನೃಣಾಂ ||33||

ಮಾರಣೋಚ್ಚಾಟನಾದೀನಿ ನಶ್ಯಂತಿ ಸ್ತೋತ್ರಪಾಠತಃ |
ಪರಕೃತ್ಯಂ ಚ ವಿಪ್ರೇಂದ್ರಾ ಅಶುಭಂ ನೈವ ಬಾಧತೇ ||34||

ಸಂಗ್ರಾಮೇ ಜಯದಂ ಚೈವ ಯಾತ್ರಾಕಾಲೇ ಫಲಪ್ರದಂ |
ಶತ್ರೂಚ್ಚಾಟನಕಾದ್ಯೇಷು ಪ್ರಶಸ್ತಂ ತದ್ಭವಿಷ್ಯತಿ ||35||

ಕಾರಾಗೃಹಗತಸ್ಯೈವ ಬಂಧನಾಶಕರಂ ಭವೇತ್ |
ಅಸಾಧ್ಯಂ ಸಾಧಯೇತ್ ಸರ್ವಮನೇನೈವ ಸುರರ್ಷಯಃ ||36||

ಏಕವಿಂಶತಿವಾರಂ ಚೈಕವಿಂಶತಿ ದಿನಾವಧಿಂ |
ಪ್ರಯೋಗಂ ಯಃ ಕರೋತ್ಯೇವ ಸ ಭವೇತ್ ಸರ್ವಸಿದ್ಧಿಭಾಕ್ ||37||

ಧರ್ಮಾರ್ಥಕಾಮಮೋಕ್ಷಾಣಾಂ ಬ್ರಹ್ಮಭೂತಸ್ಯ ದಾಯಕಂ |
ಭವಿಷ್ಯತಿ ನ ಸಂದೇಹಃ ಸ್ತೋತ್ರಂ ಮದ್ಭಕ್ತಿವರ್ಧನಂ |
ಏವಮುಕ್ತ್ವಾ ಗಣಾಧೀಶಸ್ತತ್ರೈವಾಂತರಧೀಯತ ||38||

ಇತಿ ಶ್ರೀ ದೇವರ್ಷಿ ಕೃತ ಶ್ರೀ ಗಜಾನನ ಸ್ತೋತ್ರಂ ಸಂಪೂರ್ಣಂ 
ಶ್ರೀ ಕೃಷ್ಣಾರ್ಪಣಮಸ್ತು 

ಅಡೆತಡೆಗಳ ನಿವಾರಣೆ (Removal of Obstacles): ಈ ಸ್ತೋತ್ರವನ್ನು ನಿಯಮಿತವಾಗಿ ಪಠಿಸುವುದರಿಂದ ಭಕ್ತರ ಜೀವನದಲ್ಲಿನ ಎಲ್ಲಾ ವಿಘ್ನಗಳು ಮತ್ತು ಅಡೆತಡೆಗಳು ನಿವಾರಣೆಯಾಗುತ್ತವೆ, ಕಾರ್ಯಗಳಲ್ಲಿ ಯಶಸ್ಸು ದೊರೆಯುತ್ತದೆ.
ಬುದ್ಧಿ ಮತ್ತು ಜ್ಞಾನ ವೃದ್ಧಿ (Increase in Intellect and Wisdom): ಗಣೇಶನು ಬುದ್ಧಿದಾತನಾಗಿರುವುದರಿಂದ, ಈ ಸ್ತೋತ್ರದ ಪಠಣವು ಮನಸ್ಸಿಗೆ ಸ್ಪಷ್ಟತೆ, ಜ್ಞಾನ ಮತ್ತು ವಿವೇಕವನ್ನು ಹೆಚ್ಚಿಸುತ್ತದೆ, ವಿಶೇಷವಾಗಿ ವಿದ್ಯಾರ್ಥಿಗಳಿಗೆ ಇದು ಅತ್ಯಂತ ಪ್ರಯೋಜನಕಾರಿ.
ಮಾನಸಿಕ ಶಾಂತಿ ಮತ್ತು ಆನಂದ (Mental Peace and Bliss): ಸ್ತೋತ್ರದ ಪಠಣವು ಮನಸ್ಸಿಗೆ ಶಾಂತಿಯನ್ನು ತರುತ್ತದೆ, ಮಾನಸಿಕ ಒತ್ತಡವನ್ನು ಕಡಿಮೆ ಮಾಡುತ್ತದೆ ಮತ್ತು ಆಂತರಿಕ ಸಂತೋಷವನ್ನು ಹೆಚ್ಚಿಸುತ್ತದೆ.
ಸಂಸಾರ ಬಂಧನದಿಂದ ಮುಕ್ತಿ (Liberation from Worldly Bonds): ಗಜಾನನನನ್ನು ಭವಬಂಧಹರ ಎಂದು ಸ್ತುತಿಸುವುದರಿಂದ, ಈ ಸ್ತೋತ್ರವು ಲೌಕಿಕ ಆಸೆಗಳಿಂದ ಮುಕ್ತಿ ಮತ್ತು ಆಧ್ಯಾತ್ಮಿಕ ಪ್ರಗತಿಗೆ ಸಹಾಯ ಮಾಡುತ್ತದೆ.

ಇಷ್ಟಾರ್ಥ ಸಿದ್ಧಿ (Fulfillment of Desires): ಭಕ್ತಿಯಿಂದ ಈ ಸ್ತೋತ್ರವನ್ನು ಪಠಿಸುವವರಿಗೆ, ಗಣೇಶನು ಅವರ ಶುದ್ಧ ಇಷ್ಟಾರ್ಥಗಳನ್ನು ಪೂರೈಸುತ್ತಾನೆ ಮತ್ತು ಜೀವನದಲ್ಲಿ ಸಮೃದ್ಧಿಯನ್ನು ಕರುಣಿಸುತ್ತಾನೆ.