GANAPATI STAVÀHA. श्री गणपतिस्तवः (पाठभेद)

श्री गणपतिस्तवः (पाठभेद)
श्री गणेशाय नमः

ऋषिरुवाच ॥
अजं निर्विकल्पं निराकारमेकं 
निरानन्दमानन्दमद्वैतपूर्णम् ।
परं निर्गुणं निर्विशेषं निरीहं 
परब्रह्मरूपं गणेशं भजेम ॥ १॥

गुणातीतमानं चिदानन्दरूपं 
चिदाभासकं सर्वगं ज्ञानगम्यम् ।
मुनिध्येयमाकाशरूपं परेशं 
परब्रह्मरूपं गणेशं भजेम ॥ २॥

जगत्कारणं कारणज्ञानरूपं 
सुरादिं सुखादिं गुणेशं गणेशम् ।
जगद्व्यापिनं विश्ववन्द्यं सुरेशं 
परब्रह्मरूपं गणेशं भजेम ॥ ३॥

रजोयोगतो ब्रह्मरूपं श्रुतिज्ञं 
सदा कार्यसक्तं हृदाऽचिन्त्यरूपम् । 
जगत्कारणं सर्वविद्यानिदानं 
परब्रह्मरूपं गणेशं नताः स्मः ॥ ४॥

सदा सत्ययोग्यं मुदा क्रीडमानं 
सुरारीन्हरन्तं जगत्पालयन्तम् ।
अनेकावतारं निजाज्ञानहारं 
सदा विश्वरूपं गणेशं नमामः ॥ ५॥

तमोयोगिनं रुद्ररूपं त्रिनेत्रं 
जगद्धारकं तारकं ज्ञानहेतुम् ।
अनेकागमैः स्वं जनं बोधयन्तं 
सदा सर्वरूपं गणेशं नमामः ॥ ६॥

तमस्स्तोमहारं जनाज्ञानहारं 
त्रयीवेदसारं परब्रह्मसारम् ।
मुनिज्ञानकारं विदूरे विकारं 
सदा ब्रह्मरूपं गणेशं नमामः ॥ ७॥

निजैरोषधीस्तर्पयन्तं कराद्यैः 
सुरौघान्कलाभिः सुधास्राविणीभिः । 
दिनेशांशुसन्तापहारं द्विजेशं 
शशाङ्कस्वरूपं गणेशं नमामः ॥ ८॥

प्रकाशस्वरूपं नमो वायुरूपं 
विकारादिहेतुं कलाधाररूपम् ।
अनेकक्रियानेकशक्तिस्वरूपं 
सदा शक्तिरूपं गणेशं नमामः ॥ ९॥

प्रधानस्वरूपं महत्तत्वरूपं 
धराचारिरूपं दिगीशादिरूपम् ।
असत्सत्स्वरूपं जगद्धेतुरूपं 
सदा विश्वरूपं गणेशं नताः स्मः ॥ १०॥

त्वदीये मनः स्थापयेदङ्घ्रियुग्मे 
जनो विघ्नसङ्घादपीडां लभेत । 
लसत्सूर्यबिम्बे विशाले स्थितोऽयं 
जनो ध्वान्तपीडां कथं वा लभेत ॥ ११॥

वयं भ्रामिताः सर्वथाऽज्ञानयोगा
दलब्धास्तवाङ्घ्रिं बहून्वर्षपूगान् । 
इदानीमवाप्तास्तवैव प्रसादा
त्प्रपन्नान्सदा पाहि विश्वम्भराद्य ॥ १२॥

एवं स्तुतो गणेशस्तु सन्तुष्टोऽभून्महामुने ।
कृपया परयोपेतोऽभिधातुमुपचक्रमे ॥ १३॥

इति श्रीमद्-गर्ग ऋषिकृतो गणपतिस्तवः सम्पूर्णः ॥


 ಗಣಪತಿಸ್ತವಃ

ಶ್ರೀ ಗುರುಭ್ಯೋ ನಮಃ ಹರಿ ಓಂ 
ಬ್ರಹ್ಮವಿಷ್ಣುಮಹೇಶ್ವರಾ ಊಚುಃ।
ಅಜಂ ನಿರ್ವಿಕಲ್ಪಂ ನಿರಾಕಾರಮೇಕಂ
ನಿರಾಲಮ್ಬಮದ್ವೈತಮಾನನ್ದಪೂರ್ಣಮ್ ।
ಪರಂ ನಿರ್ಗುಣಂ ನಿರ್ವಿಶೇಷಂ ನಿರೀಹಂ 
ಪರಂ ಬ್ರಹ್ಮರೂಪಂ ಗಣೇಶಂ ಭಜೇಮ ॥ 1॥

ಗುಣಾತೀತಮಾದ್ಯಂ ಚಿದಾನನ್ದರೂಪಂ 
ಚಿದಾಭಾಸಕಂ ಸರ್ವಗಂ ಜ್ಞಾನಗಮ್ಯಮ್ ।
ಮುನಿಧ್ಯೇಯಮಾಕಾಶರೂಪಂ ಪರೇಶಂ 
ಪರಂ ಬ್ರಹ್ಮರೂಪಂ ಗಣೇಶಂ ಭಜೇಮ ॥ 2॥

ಜಗತ್ಕಾರಣಂ ಕಾರಣಾಜ್ಞಾನಹೀನಂ 
ಸುರಾದಿಂ ಸುಖಾದಿಂ ಯುಗಾದಿಂ ಗಣೇಶಮ್ ।
ಜಗದ್ವ್ಯಾಪಿನಂ ವಿಶ್ವವನ್ದ್ಯಂ ಸುರೇಶಂ 
ಪರಂ ಬ್ರಹ್ಮರೂಪಂ ಗಣೇಶಂ ಭಜೇಮ ॥ 3॥

ರಜೋಯೋಗತೋ ಬ್ರಹ್ಮರೂಪಂ 
ಶ್ರುತಿಜ್ಞಂ ಸದಾ ಕಾರ್ಯಸಕ್ತಂ ಹೃದಾಽಚಿನ್ತ್ಯರೂಪಮ್ ।
ಜಗತ್ಕಾರಕಂ ಸರ್ವವಿದ್ಯಾನಿಧಾನಂ 
ಸದಾ ಬ್ರಹ್ಮರೂಪಂ ಗಣೇಶಂ ನತಾಃ ಸ್ಮಃ ॥ 4॥

ಸದಾ ಸತ್ತ್ವಯೋಗಂ ಮುದಾ ಕ್ರೀಡಮಾನಂ 
ಸುರಾರೀನ್ ಹರನ್ತಂ ಜಗತ್ಪಾಲಯನ್ತಮ್ ।
ಅನೇಕಾವತಾರಂ ನಿಜಾಜ್ಞಾನಹಾರಂ 
ಸದಾ ವಿಷ್ಣುರೂಪಂ ಗಣೇಶಂ ನತಾಃ ಸ್ಮಃ ॥ 5॥

ತಮೋಯೋಗಿನಂ ರುದ್ರರೂಪಂ ತ್ರಿನೇತ್ರಂ 
ಜಗದ್ಧಾರಕಂ ತಾರಕಂ ಜ್ಞಾನಹೇತುಮ್ ।
ಅನೇಕಾಗಮೈಃ ಸ್ವಂ ಜನಂ ಬೋಧಯನ್ತಂ 
ಸದಾ ಶರ್ವರೂಪಂ ಗಣೇಶಂ ನತಾಃ ಸ್ಮಃ ॥ 6॥

ತಮಃಸ್ತೋಮಹಾರಂ ಜನಾಜ್ಞಾನಹಾರಂ 
ತ್ರಯೀವೇದಸಾರಂ ಪರಬ್ರಹ್ಮಪಾರಮ್ ।
ಮುನಿಜ್ಞಾನಕಾರಂ ವಿದೂರೇ ವಿಕಾರಂ 
ಸದಾ ಬ್ರಧ್ನರೂಪಂ ಗಣೇಶಂ ನತಾಃ ಸ್ಮಃ॥ 7॥

ನಿಜೈರೌಷಧೈಸ್ತರ್ಪಯನ್ತಂ ಕರೋಘೈಃ 
ಸುರೌಘಾನ್ಕಲಾಭಿಃ ಸುಧಾಸ್ರಾವಿಣೀಭಿಃ ।
ದಿನೇಶಾಂಶುಸನ್ತಾಪಹಾರಂ ದ್ವಿಜೇಶಂ 
ಶಶಾಂಕಸ್ವರೂಪಂ ಗಣೇಶಂ ನತಾಃ ಸ್ಮಃ ॥ 8॥

ಪ್ರಕಾಶಸ್ವರೂಪಂ ನಭೋವಾಯುರೂಪಂ 
ವಿಕಾರಾದಿಹೇತುಂ ಕಲಾಕಾಲಭೂತಮ್ ।
ಅನೇಕಕ್ರಿಯಾನೇಕಶಕ್ತಿಸ್ವರೂಪಂ 
ಸದಾ ಶಕ್ತಿರೂಪಂ ಗಣೇಶಂ ನತಾಃ ಸ್ಮಃ ॥ 9॥

ಪ್ರಧಾನಸ್ವರೂಪಂ ಮಹತ್ತತ್ತ್ವರೂಪಂ 
ಧರಾವಾರಿರೂಪಂ ದಿಗೀಶಾದಿರೂಪಮ್ ।
ಅಸತ್ಸತ್ಸ್ವರೂಪಂ ಜಗದ್ಧೇತುಭೂಪಂ 
ಸದಾ ವಿಶ್ವರೂಪಂ ಗಣೇಶಂ ನತಾಃ ಸ್ಮಃ ॥ 10॥

ತ್ವದೀಯೇ ಮನಃ ಸ್ಥಾಪಯೇದಂಘ್ರಿಯುಗ್ಮೇ 
ಜನೋ ವಿಘ್ನಸಂಘಾನ್ನ ಪೀಡಾಂ ಲಭೇತ ।
ಲಸತ್ಸೂರ್ಯಬಿಮ್ಬೇ ವಿಶಾಲೇ ಸ್ಥಿತೇಽಯಂ 
ಜನೋ ಧ್ವಾನ್ತಬಾಧಾಂ ಕಥಂ ವಾ ಲಭೇತ ॥ 11॥

ವಯಂ ಭ್ರಾಮಿತಾಃ ಸರ್ವಥಾಽಜ್ಞಾನಯೋಗಾ
ದಲಬ್ಧ್ವಾ ತವಾಂಘ್ರಿಂ ಬಹೂನ್ವರ್ಷಪೂಗಾನ್ ।
ಇದಾನೀಮವಾಪ್ತಾಸ್ತವೈವ ಪ್ರಸಾದಾತ್ಪ್ರಪನ್ನಾನ್ಸದಾ ಪಾಹಿ ವಿಶ್ವಮ್ಭರಾದ್ಯ ॥ 12॥

ಏವಂ ಸ್ತುತೋ ಗಣೇಶಸ್ತು ಸನ್ತುಷ್ಠೋಽಭೂನ್ಮಹಾಮುನೇ ।
ಕೃಪಯಾ ಪರಯೋಪೇತೋಽಭಿಧಾತುಂ ತಾನ್ ಪ್ರಚಕ್ರಮೇ ॥ 13॥

ಇತಿ ಶ್ರೀಮದ್-ಗರ್ಗ ಋಷಿಕೃತೋ ಗಣಪತಿಸ್ತವಃ ಸಮ್ಪೂರ್ಣಃ