VAISHNAVA SMAARTA (ವೈಷ್ಣವ, ಸ್ಮಾರ್ತ ತಾರತಮ್ಯ)

ಸಂಗ್ರಹಿತ 
VAISHNAVA SMAARTA (ವೈಷ್ಣವ, ಸ್ಮಾರ್ತ ತಾರತಮ್ಯ)
"ಬ್ರಾಹ್ಮಣರಲ್ಲೆ ವೈಷ್ಣವ, ಸ್ಮಾರ್ತ ಅನ್ನೋ ತಾರತಮ್ಯ ಸರೀನಾ" ಅಂತ....  ಪೂ.ವೆಂಕಟಾಚಲ ಅವಧೂತರ ಶಿಷ್ಯರೊಬ್ಬರು ಹೇಳಿದ್ದು.

ಇದಕ್ಕೆ ಉತ್ತರ ಯೊಚಿಸುತ್ತಾ  ನನ್ನ ಅರಿವಿಗೆ ಎಟುಕಿದ ಕೆಲವು ಮಾತುಗಳನ್ನು ಈ ಬಳಗದಲ್ಲಿ ಹಂಚಿಕೊಳ್ಳುತ್ತಿದ್ದೇನೆ. ಜಗತ್ತಿನಲ್ಲಿ ಇರುವ ಎಲ್ಲ ಭಾಷೆಗಳಲ್ಲಿ ಸಂಸ್ಕೃತ ಶ್ರೇಷ್ಠವಾದ ಭಾಷೆ. ಏಕೆಂದರೆ ಇದೊಂದೇ ಭಾಷೆಯಲ್ಲಿ ಪ್ರತಿಯೊಂದು ವಸ್ತುವಿನ ನಾಮಕ್ಕೂ/ಶಬ್ದಕ್ಕೂ ಅದರ ಗುಣವನ್ನು ಹೇಳುವ ಸಾಮರ್ಥ್ಯ ಇರುವುದು ಎನ್ನುತ್ತಾರೆ ಭಾಷಾತಜ್ಞರು (Sanskrit is the only etymological Language in the world)... ವೈಷ್ಣವ, ಸ್ಮಾರ್ತ ಅನ್ನುವ ಶಬ್ದಗಳ ಅರ್ಥವನ್ನು ತಿಳಿದುಕೊಂಡಾಗ ನಮ್ಮ ಅಜ್ಞಾನದಿಂದ ಹುಟ್ಟಿಕೊಂಡ ಈ ತಾರತಮ್ಯಗಳೆಲ್ಲವೂ ಹೊರಟುಹೋಗುತ್ತವೆ. 

ನಾವು ಅನೇಕ ಸಂಸ್ಕೃತ ಮಂತ್ರಗಳನ್ನು ಹೇಳುವಾಗ ಕೇಳಿರುತ್ತೇವೆ, ಆದರೆ ಅದರ ಅರ್ಥ ನಮ್ಮ ಅರಿವಿಗೆ ಬಂದರೆ ನಮ್ಮ ಎಷ್ಟೋ ಸಮಸ್ಯೆಗಳಿಗೆ ಪರಿಹಾರ ಅಲ್ಲೇ ಇರುತ್ತದೆ. 
ಉದಾ :  "ಶ್ರೌತ ಸ್ಮಾರ್ತ ನಿತ್ಯಕರ್ಮಾನುಷ್ಠಾನ ಯೋಗ್ಯತಾ ಸಿದ್ದ್ಯರ್ಥಂ ಯಜ್ಞೋಪವೀತಧಾರಣಂ ಚ ಕರಿಷ್ಯೆ" ಅಂತಲೇ ಎಲ್ಲರೂ ಸಂಕಲ್ಪಮಾಡುವುದು. ಇಲ್ಲಿ ಶ್ರುತಿ ಸ್ಮೃತಿಗಳಿಗನುಸಾರವಾಗಿ (ಶ್ರುತಿ ಸ್ಮೃತಿಗಳು ಅಂದರೆ ವೇದಗಳು) ಕರ್ಮಗಳನ್ನು ಮಾಡುವವರು "ಶ್ರೌತರು"... ಸ್ಮೃತಿಗಳಿಗನುಸಾರವಾಗಿ ಕರ್ಮಗಳನ್ನು ಮಾಡುವವರು "ಸ್ಮಾರ್ತರು" ಅಂತ ಅರ್ಥ. ವೇದಗಳಲ್ಲಿ ಏನು ಹೇಳಿದ್ದಾರೋ ಅದನ್ನೇ  "ಸ್ಮೃತಿಕಾರರು" ಆಯ್ಕೆಮಾಡಿಕೊಂಡು, ವಿಸ್ತರಿಸಿ ಎಲ್ಲರಿಗೂ ಕರ್ಮಾಚರಣೆಯಲ್ಲಿ ಅನುಕೂಲವಾಗುವಂತೆ ಸ್ಮೃತಿಗ್ರಂಥಗಳನ್ನು/ಧರ್ಮಗ್ರಂಥಗಳನ್ನು ರಚಿಸಿ ಹೋಗಿದ್ದಾರೆ (ಉದಾ: ಮನುಸ್ಮೃತಿ, ಯಾಜ್ಞವಲ್ಕ್ಯಸ್ಮೃತಿ, ಪರಾಶರಸ್ಮೃತಿ... ಇತ್ಯಾದಿ) ಆದ್ದರಿಂದ ಮೂಲತಃ ಎಲ್ಲ ಬ್ರಾಹ್ಮಣರೂ "ಸ್ಮಾರ್ತರೆ".... ಅಂದರೆ ಶ್ರುತಿ-ಸ್ಮೃತಿಗಳಿಗನುಸಾರವಾಗಿ ಕರ್ಮಾನುಷ್ಠಾನ ಮಾಡುವವರು ಎಂಬುದು "ಸ್ಮಾರ್ತ" ಶಬ್ದದ ಅರ್ಥ.... ಹಾಗೆಂದ ಮೇಲೆ ವೈಷ್ಣವರು ಸ್ಮಾರ್ತರಲ್ಲವೆ ? ಖಂಡಿತಾ ಹೌದು !!  ಇದೆಲ್ಲ ವಿಷಯಗಳು ತಿಳಿದಾಗ ಬ್ರಾಹ್ಮಣರಲ್ಲಿ ಜಗಳವಿರುವುದಿಲ್ಲ  / ಭಿನ್ನಾಭಿಪ್ರಾಯಗಳು ಇರುವುದಿಲ್ಲ... 

ಈಗ ವೈಷ್ಣವರು "ವಿಷ್ಣು" ಪಾರಮ್ಯವನ್ನು ಒಪ್ಪುವವರು ಅನ್ನುತ್ತೀರಾ ?. ಹಾಗಾದರೆ ವಿಷ್ಣು ಶಬ್ದ ಏನು ಹೇಳುತ್ತದೆ ನೋಡೋಣ- ವೇವೇಷ್ಟಿ-ವಿಷಲ್ ವ್ಯಾಪ್ತೌ, ಎಂಬ ವಿಷ್ಣು ಶಬ್ದದ ನಿರ್ವಚನದಿಂದ ತಿಳಿಯುವ ಅರ್ಥ, ಎಲ್ಲ ಕಡೆಯೂ ತುಂಬಿರುವವನು, ಸರ್ವಶಕ್ತ, ಸರ್ವವ್ಯಾಪಿ, ವಿಶಂತಿ ಸರ್ವಭೂತಾನಿ - ಎಲ್ಲ ಜೀವಿಗಳ ಒಳಗೆ ಪ್ರವೇಶಿಸುವವ... ಹೀಗೆ ಭಗವಂತನ ಅನೇಕ ಗುಣಗಳನ್ನು ಹೇಳುವ ನಾಮ "ವಿಷ್ಣು" ... ಹಾಗಾದರೆ ವಿಷ್ಣು ಯಾರಿಗೆ ದೇವರಲ್ಲ ಹೇಳಿ ? ಕೇವಲ ವೈಷ್ಣವರಿಗೆ ಮಾತ್ರ ವಿಷ್ಣು ದೇವನೆ.... 
ಹಾಗೇ, ಶಿವನ ನಾಮ ವಿಷ್ಣುಸಹಸ್ರನಾಮದಲ್ಲಿ ಬಂದಿಲ್ಲವೇ "ಸರ್ವಃ ಶರ್ವಃ ಶಿವಃ ಸ್ಥಾಣುರ್ಭೂತಾದಿರ್ನಿಧಿರವ್ಯಯಃ..." ಅದರಿಂದ ಶಿವ ನಾಮವೂ ಭಗವಂತನ ನಾಮವಾಯಿತಲ್ಲವೇ... 
ದೇವರು ಒಬ್ಬನೇ ! ಆದರೆ, ಅವನ ನಾಮ ಹಲವು.... ಅದನ್ನರಿತು ನಡೆದಾಗ ಯಾವುದೂ ಗೊಂದಲವಿಲ್ಲ... ಅದನ್ನೆ ಶ್ವೇತಾಶ್ವತರೋಪನಿಷತ್ ಹೀಗೆ ಹೇಳಿತು : 
ಏಕೋ ದೇವಃ ಸರ್ವಭೂತೇಷು ಗೂಢಃ 
ಸರ್ವವ್ಯಾಪಿ ಸರ್ವಭೂತಾಂತರಾತ್ಮಾ ।
ಕರ್ಮಾಧ್ಯಕ್ಷಃ ಸರ್ವಭೂತಾಧಿವಾಸಃ
ಸಾಕ್ಷಿ ಚೇತಾ ಕೇವಲೋ ನಿರ್ಗುಣಶ್ಚ   ।।

ಕೊನೆಯದಾಗಿ ಒಂದು ಕಥೆ ಹೇಳಿ ಮುಕ್ತಾಯ ಮಾಡುತ್ತೇನೆ  : 
ಒಮ್ಮೆ ಅವಧೂತರ ಬಳಿ ಒಬ್ಬರು ಬಂದು ಒಂದು ಪ್ರಶ್ನೆ ಹಾಕಿದರು - ವಿಷ್ಣು ಮತ್ತು ಶಿವರಲ್ಲಿ ಯಾರು ಶ್ರೇಷ್ಠರು ? ಅಂತ. ಅದಕ್ಕೆ ಅವಧೂತರು ಮುಗುಳ್ನಗುತ್ತಾ ಕೊಟ್ಟ ಉತ್ತರ ತುಂಬ ಸರಳ ಹಾಗು ರೋಚಕವಾಗಿತ್ತು. ಅವರು ಮಾಡಿದ್ದು ಇಷ್ಟೇ ! ಅಲ್ಲಿಯೇ ಇದ್ದ ಒಂದು ತೆಂಗಿನ ಮರವನ್ನು ತೋರಿಸಿ, ಪ್ರಶ್ನೆಹಾಕಿದಾತನಿಗೆ ಅವರೊಂದು ಪ್ರಶ್ನೆ ಹಾಕಿದರು... "ನೊಡಪ್ಪಾ ! ಈ ತೆಂಗಿನ ಮರದಲ್ಲಿರುವ ಕಾಯಿ ಶ್ರೇಷ್ಠವೋ, ಗರಿ ಶ್ರೇಷ್ಠವೋ ? ಅಂತ.... " ಅವಧೂತರ ಪ್ರಶ್ನೆಗೆ ಉತ್ತರಿಸಲು ಆತನಿಗೆ ಮುಜುಗರವಾಯಿತು.... ಆಗ ಅವಧೂತರೆ ಹೇಳುತ್ತಾರೆ - "ಅವನವನ ಅವಶ್ಯಕತೆಯ ಮೇಲೆ ಇದು ಅವಲಂಭಿತವಾಗಿದೆಯಲ್ಲವೇ, ಒಂದು ವೇಳೆ ಅಡುಗೆಗೆ ಕಾಯಿ ಬೇಕಾಗಿದ್ದರೆ ಒಬ್ಬ ಕಾಯಿ ಕೊಯ್ತಾನೆ, ಒಬ್ಬನಿಗೆ ಮನೆಯ ಸಮಾರಂಭಕ್ಕೆ ಚಪ್ಪರ ಹಾಕಲು ಗರಿ ಬೇಕಾಗಿದೆ, ಆಗ ಅವ ಗರಿ ಕೊಯ್ತಾನೆ !!... ಆತನನ್ನು ಕರೆದು ಗರಿಗಿಂತ ಕಾಯಿ ಶ್ರೇಷ್ಠ ! ಕಾಯಿ ಕೊಂಡು ಹೋಗು ಅಂತ ಹೇಳಲಿಕ್ಕಾಗುತ್ತದೆಯೆ.... ಹಾಗೆ ಅವರವರ ಅವಶ್ಯಕತೆಯಂತೆ/ಮನದಿಚ್ಛೆಯಂತೆ ಬದುಕಿನ ನಡೆಯಲ್ಲೂ ಭಗವಂತನ ನಾಮ ಕೂಡ ಅಂತ ಹೇಳಿ ಹೊರಟು ಹೋಗುತ್ತಾರೆ.... 

ಸಮಾಜದಲ್ಲಿ ಎಲ್ಲಿಯತನಕ ಅರಿವಿನ ಬೆಳಕಿನ ಕೊರತೆ ಇರುತ್ತದೋ ಅಲ್ಲಿಯ ತನಕ ಬ್ರಾಹ್ಮಣರಲ್ಲೇ ಇಂತಹ ವಿಭಾಗಗಳನ್ನು ನಾವು ಕಾಣುತ್ತಿರುತ್ತೇವೆ.