ಶ್ರೀ ವಿಜಯ ಕವಚ
ಸ್ಮ ಝೂರಿಸಿ ಬದುಕಿರೋ | ದಿವ್ಯ ಚರಣಕ್ಕೆರಗಿರೋ |
ದುರಿತ ಕಳೆವ ವಿಜಯ ಗುರುಗಳೆಂಬರಾ || ಪ ||
ದಾಸರಾಯನ ದಯವ | ಸೂಸಿ ಪಡೆದನಾ |
ದೋಷರಹಿತನಾ ಸಂತೋಷ ಭರಿತನಾ || 1 ||
ಜ್ಞಾನವಂತನಾ ದಯ | ನಿಧಾನಿ ಶಾಂತನಾ |
ಮಾನ್ಯವಂತನಾ ಬಲು | ವದಾನ್ಯದಾಂತನ || 2 ||
ಹರಿಯ ಭಜಿಸುವಾ | ನರಹರಿಯ ಭಜಿಸವಾ |
ಗುರಿತ ತೃಜಿಸುವ ಜನಕೆ | ಹರುಷ ಸುರಿಸುವ || 3 ||
ಮೋದಭರಿತನಾ ಪಂಚ | ಭೇದವರಿತನಾ |
ಸಾಧುಚರಿತನಾ ಮನ | ವಿಷಾದ ಮರೆತನಾ || 4 ||
ಇವರ ನಂಬಿದಾ ಜನಕೆ | ಭವವಿದೆಂಬುದೂ |
ಹವಣವಾಗದೋನ | ಮ್ಮವರ ಮತವಿದೂ ||5 ||
ಪಾಪ ಕೋಟಿಯಾ ರಾಶಿ | ಲೇಪವಾಗದೋ |
ತಾಪ ಕಳೆವನೂ ಬಲು | ಯಾಪಯೋನಿಧಿ || 6 ||
ಕವನ ರೂಪದಿ ಹರಿಯ | ಸ್ತವನ ಮಾಡಿದ |
ಭುವನ ಬೇಡಿದಾ | ಮಾಧವನ ನೋಡಿದಾ || 7 ||
ರಂಗನೆಂದನಾ ಭವವು | ಹಿಂಗಿತೆಂದನಾ |
ಮಂಗಳಾಂಗನ ಅಂತ | ರಂಗವರಿತನಾ || 8 ||
ಕಾಶಿನಗರದಲ್ಲಿದ್ದ | ವ್ಯಾಸದೇವನಾ |
ದಯವಸೂಸಿ | ಪಡೆದನ ಉಲ್ಲಾಸತನದಲಿ || 9 ||
ಚಿಂತೆ ಬ್ಯಾಡಿರೋ ನಿ| ಶ್ಚಿಂತರಾಗಿರೋ |
ಶಾಂತ ಗುರುಗಳಾ ಪಾದ | ವಂತು ನಂಬಿರೋ || 10 ||
ಖೇದವಾಗದೋ ನಿಮಗೆ | ಮೋದವಾಹುದೋ |
ಆದಿದೇವನಾ ಸು | ಪ್ರಸಾದವಾಹದೋ || 11 ||
ತಾಪ ತಡೆವನೋ ಬಂದ | ಪಾಪ ಕಡಿವನೂ |
ಶ್ರೀಪತಿಯ ಪದ ಸ | ಮೀಪವಿಡುವನು || 12 ||
ಗಂಗೇ ಮಿಂದರೇ | ಮಲವು ಹಿಂಗಿತಲ್ಲದೇ |
ರಂಗನೊಲಿಯನೋ ಭಕ್ತರ | ಸಂಗ ದೊರೆಯದೇ ||13 ||
ವೇದವೋದಲು ಬರಿದೆ | ವಾದ ಮಾಡಲೂ |
ಹಾದಿ ದೊರಿಯದೂ ಬುಧರ | ಪಾದ ನಂಬದೇ || 14 ||
ಲೆಕ್ಕವಿಲ್ಲದಾ ದೇಶ | ತುಕ್ಕಿಬಂದರೂ |
ದು:ಖವಿಲ್ಲದೇ ಲೇಶ | ಭಕ್ತಿ ದೊರಕದೋ || 15 ||
ದಾನ ಮಾಡಲು ದಿವ್ಯ | ಗಾನ ಪಾಡಲೂ |
ಜ್ಞಾನ ದೊರೆಯದು ಇವ | ರಧೀನವಾಗದೇ || 16 ||
ಇಷ್ಟು ಯಾತಕೇ | ಕಂಡ ಕಷ್ಟವ್ಯಾತಕೇ |
ದಿಟ್ಟ ಗುರುಗಳಾ ಪಾದ | ಮುಟ್ಟಿ ಭಜಿಸಿರೋ ||17||
ಪೂಜೆ ಮಾಡಲೂ ಕಂಡ | ಗೋಜು ಬೀಳಲೂ |
ಬೀಜ ಮಾತಿದೂ ಫಲ ಸ | ಹಾಜವಾಗದೂ | 18 ||
ಸುರರು ಎಲ್ಲರೂ ಇವರ | ಕರವ ಪಿಡಿವರೂ |
ತರಳರಂದದೀ ಹಿಂದೆ | ತಿರುಗಿತಿಪ್ಪರೂ || 19 ||
ಗ್ರಹಗಳೆಲ್ಲವೂ ಇವರ್ಗೆ | ಸಹಾಯ ವಾಗುತಾ |
ಅಹೋರಾತ್ರಿಲೀ ಸುಖದ | ನಿವಹ ಕೊಡುವವು ||20 ||
ವ್ಯಾದಿ ಬಾರದೊ ದೇಹ | ಬಾಧೆ ತಟ್ಟದೋ |
ಆದಿದೇವನಾ ಸುಪ್ರ| ಸಾದ ವಾವುದೊ || 21 ||
ಪತಿತ ಪಾಮರಾ ಮಂದ | ಮತಿಯು ನಾ ಬಲೂ |
ತುತಿಸಲಾಪನೇ ಇವರ | ಅತಿಶಯಂಗಳಾ || 22 ||
ಕರುಣದಿಂದಲೇ ಎಮ್ಮ | ಪೊರೆವನಲ್ಲದೇ |
ದುರಿತಕೋಟಿಯಾ ಬೇಗ | ತರಿವ ದಯಾದಲೀ || 23 ||
ಮಂದಮತಿಗಳೂ ಇವರ | ಚಂದವರಿಯದೇ |
ನಿಂದಿಸುವರೋ ಭವದ | ಬಂಧ ತಪ್ಪದು || 24 ||
ಇಂದಿರಾಪತೀ ಇವರ| ಮುಂದೆ ಕುಣಿವನೋ |
ಅಂದ ವಚನವಾ ನಿಜಕೆ | ತಂದು ಕೊಡುವನೋ ||25 ||
ಉದಯಕಾಲದೀ ಈ | ಪದವ ಪಠಿಸಲೂ |
ಮುದಡನಾದರೂ ಜ್ಞಾನ | ಉದಯವಾಹುದೋ || 26 ||
ಸಟೆಯಿದಲ್ಲವೊ ವ್ಯಾಸ | ವಿಠಲ ಬಲ್ಲನೋ |
ಪಠಿಸಬಹುದಿದೂ ಕೇಳಿ | ಕುಟಿಲರಹಿತರೂ || 27||
|| ಮುಕ್ತಾಯ ||
No comments:
Post a Comment